Notas de Prensa

REDEIRAS DE GALICIA E A CONSELLERÍA DO MAR COLABORAN PARA AMOSAR A PROFESIÓN DE REDEIRA A TRAVÉS DAS NOVAS TECNOLOXÍAS

Redeiras nas redes divulgará nas redes sociais a través de catro vídeos titoriais as técnicas elementais de enmalle de artes menores, cerco, arrastre e palangre

Malpica de Bergantiños, 31 de xullo de 2018.- A Federación Galega de Redeiras Artesás O Peirao e a Consellería do Mar, a través da Dirección Xeral de Desenvolvemento Pesqueiro, veñen de asinar un convenio de colaboración para divulgar as peculiaridades da profesión de redeira a través das novas tecnoloxías, especialmente das redes sociais. A directora xeral de Desenvolvemento Pesqueiro, Susana Rodríguez Carballo, e a presidenta da Federación Galega de Redeiras Artesás O Peirao, Verónica Veres Tasende, asinaron hoxe este acordo no que ambas coinciden en que “contribuirá a unha maior proxección e visibilización do colectivo de redeiras”.

Segundo explicou a directora xeral de Desenvolvemento Pesqueiro, a iniciativa que leva por título Redeiras nas Redes, fomentará a través das novas tecnoloxías a profesionalización do sector, tradicionalmente artesanal, proporcionando ferramentas e coñecementos que favorecerán a adquisición dos certificados de profesionalidade, hoxe fundamentais para exercer a profesión de redeira.

A presidenta da Federación Galega de Redeiras O Peirao destacou que este ano están a presentarse aos exames de adquisición dos certificados de profesionalidade unhas 50 redeiras en toda Galicia e estes instrumentos “serviranlle para lembrar técnicas e coñecementos adquiridos nos distintos cursos que foron necesarios para poder presentarse a estes exames”.

Deste xeito, a Federación Galega de Redeiras O Peirao elaborará catro vídeos titoriais das distintas artes que teñen que coñecer as redeiras que queiran exercer de xeito profesional: artes menores, cerco, palangre e arrastre. Serán precisamente as redeiras expertas en cada un destas modalidades, as protagonistas dos vídeos que se gravarán proximamente e que logo de distribuirán a través das redes sociais de O Peirao.

A acción, financiada pola Consellería do Mar no marco do convenio asinado esta mañá, contribuirá a informar e concienciar da importancia da actividade da redeira como parte fundamental das actividades do mar.

 

25 PERSOAS COMEZAN EN CARIÑO A SÚA FORMACIÓN COMO REDEIRAS

O curso está promovido pola Federación Galega de Redeiras Artesás  e financiado pola Dirección Xeral de Desenvolvemento Pesqueiro da Consellería do Mar

Malpica de Bergantiños, 12 de outubro de 2017.- Un total de 25 persoas, maioritariamente mulleres, comezarán este venres, 13 de outubro, o curso de formación como redeiras que se desenvolverá en Cariño ata o 5 de decembro deste ano. A actividade está promovida pola Federación Galega de Redeiras Artesás O Peirao e financiada pola Dirección Xeral de Desenvolvemento Pesqueiro da Consellería do Mar.

O curso consta de 300 horas e habilitará aos participantes para presentarse ao exame de cara a optar á cualificación profesional que os acreditará como redeira, esencial  para poder exercer esta ocupación e para darse de alta no ISM.

O curso estrutúrase en cinco bloques temáticos: introdución xeral e os módulos específicos de cerco, artes menores, palangre e arrastre. Os docentes serán  Laura Vilaboy, Mercedes Martelo, Rosa Isabel Rodríguez, Ángeles Mille e Isaac Fernández.

A Consellería do Mar cedeu a Aula de Desenvolvemento Pesqueiro de Cariño para a realización desta actividade formativa. As sesións docentes desenvolveranse de luns a venres de 10.00 horas a 14.00 horas e de 16.00 horas a 20.00 horas. A data de remate do curso será o 5 de decembro.


REDEIRAS DE GALICIA CONVOCA UN CURSO DE CONFECCIÓN DE REDES DE ARTES MENORES PARA FAVORECER A PROFESIONALIZACIÓN DO SECTOR


A actividade formativa está financiada pola Secretaría Xeral de Igualdade da Xunta de Galicia

Malpica de Bergantiños, 26 de agosto de 2017.- A Federación Galega de Redeiras Artesás O Peirao vén de convocar un curso de confección e mantemento de aparellos de artes menores que se desenvolverá en Malpica de Bergantiños do 11 ao 26 de setembro. Este curso capacitará ás alumnas e alumnos para a obtención do certificado de profesionalidade de redeira, esencial  para poder traballar como profesional.

As interesadas e os interesados en formarse neste módulo poden solicitar máis información nos teléfonos 677 075 223 e 691 237 370 ou no correo info@redeirasdegalicia.org.

A encargada de impartir esta actividade formativa será a redeira Rosa Isabel Rodríguez Vidal e desenvolverase na caseta da Asociación de Redeiras O Fieital, no Peirao Sur, 48, en Malpica.

Este curso de confección e mantemento de aparallos de artes menores está financiado pola Secretaría Xeral de Igualdade da Xunta de Galicia e ten entre os seus obxectivos,  avanzar na cualificación profesional das redeiras e na profesionalización do sector, favorecer a inclusión social dun colectivo con baixa formación académica pero ilusionado por activarse no eido laboral, promover o empoderamento das mulleres do sector primario galego e visibilizar o asociacionismo como unha ferramenta para avanzar en igualdade.

A reunión de coordinación do curso terá lugar o mércores, 6 de setembro, na caseta do Fieital.


Buscar

Traductor GOOGLE

REDEIRAS DE GALICIA E A CONSELLERÍA DO MAR COLABORAN PARA AMOSAR A PROFESIÓN DE REDEIRA A TRAVÉS DAS NOVAS TECNOLOXÍAS

Redeiras nas redes divulgará nas redes sociais a través de catro vídeos titoriais as técnicas elementais de enmalle de artes menores, cerco, arrastre e palangre (Malpica de Bergantiños, 31 de xullo de 2018)